Kreis Wappen
Kopfgrafik
| Home| Kontakt| Satzung| Beitritt| Impressum| Webmaster |
Kopfgrafik

Eten as en Boor

Wat gifft dat för apardige Rezepten in de bunten Bläder! Op sövenuntwintig Sieden warrt jedeen Hussfro von so'n kloke Emma ut de Redaktschoon opmuntert, wat se doon mutt, ümdat ehre Kostgängers nich mal untofreden ut de Spoor lopen un an't Enn noch frömdgahn doot.

Ik meen ja, uns Vöröllern hebbt al lang weten, dat de Leev dörch den Magen geiht‚ aver de Minsch schall ok bedenken‚ dat vör den Maag de Tung dat Seggen hett! Nu mag de Düvel weten, wokeen sik de niemodschen Mengelagen utklamüstert hett? Ik bün da ok nich totaal immuun gegen un studeer de Texten ünner de bunten Biller, ja. Aver bi männig een Snick-Snack kümmt mi dat Gruun an! Lüüd, dat gifft doch tatsächlich Fruuns, de sowat ut reine Niescheer nahmaken doot!

Weer ja allns nich so leeg, meen ik, wenn de Kaakmamselln dat ok sülven utlöpeln wörrn. Meist aver sünd de ja verheiraadt, un so'n unschülligen Keerl mit Smacht in'n Buuk, de kann sik nich mal wehren!

Oha, un denn heet dat: "Friß,Vogel - oder stirb"! Naja, gifft ok ja Fruunslüüd, de dat dar op anleggen doot un den Macker bangmaken wüllt - un regelrecht vergrulen! In den Fall, dücht mi, sünd de good an, de in ehren Bedriev en Kantine hebbt. Dar gifft dat nämlich Utwahl, un bi dat "Swatte Brett" scheed sik al de Fleeschvertehrers vun de Vegetariers.

Da gifft keen Överraschen, nee du. Man bi so'n gröne Kaakmamsell gifft keen Utweken! - De Keerl kümmt nah Huus, Kohldamp mang de Ogen, siene Dulcinea ballanceert en hitte Oploopform vör de Bost un seggt:

"Rat' mal, Schatz, wie das Gericht heißt???" Ehre Stimm trällert so unschüllig, as weer se güstern eerst kunfermeert. Un he denkt: Mann, ik will keen Radel raden, ik will wat mang de Tähn hebben! Tweemal fröggt de gode Fee em noch, un de Stimm warrt jümmer wat höger un ok al beten spitzer. Nu warrt em dat krupen, he lüft den Deckel vun de Geheempann un plieröögt na den Kraam rin. Un wat he dar süht, is nich jüst to'n Freun. Un wat em in de Nääs krüppt‚ dat is Balkan‚ natuur - puur.  "Na", fleit Ilona, "denk doch mal an unsren Urlaub!!" Oha, ja, veerteihn Daag lang - nix as Knoflock! Oh nee! "Es ist nicht, was du denkst, mein Schatz, nicht Knoblauch, nein, es ist Bärlauch, sehr gesund!" He seggt nix, steiht op, geiht nah de Döör. "So, Bärlauch", seggt he bi't Ruutgahn.

"Seh ik villicht ut as'n Boor? Den Kraam bring man na Hagenbeck! Dar hebbt se so'n Deerten anne Kost. Dat Reisen na all de Knofflocklänner heff ik uns verbaden, un nu kümmst du mit dat Kruut dörch de Achterdöör! Aver nich mit mi! Tschüüs solang, ik spies hüüt bi Anke ehre Wustbood gliek üm de Eck! “ - Ilona hett dree Daag ehren gesunden Oploop eten - man alleen.

Ingrid Koch

 

 

 

 

 

 

Aktuelles


Heft 203 | März 2017


Vorneweg

Die Meinung der Redaktion im neuen Heft: mehr

Neueste Infos

Brücken verbinden: wider das Vergessen, Artikel in der Gadebusch-Rehnaer Zeitung vom 5. Oktober 2017, mehr

Zu Gast in Mölln: Der Mann, der die Mauer öffnete, Artikel in LN online vom 2. Oktober 2017, mehr

So lebten die Lauenburger vor 3500 Jahren, Artikel in der "LL" vom 6. Juni 2017, mehr

5000 Jahre alt: Urnenfeld und Steinzeitwerkzeuge in Geesthacht, Artikel im "Echo", Mai 2017, mehr

Schlagwortregister, Index
Erfassung bis Heft LH 168, mehr